DISEINATZAILE GONBIDATUAK
Getxo modan dago. 39. edizio honetan parte hartzen duten diseinatzaileetako batzuk aurkeztuko dizkizugu.
Assaad Awad artista eta diseinatzaile hispano-libanoarra da, eta oso gaztetatik agertu zuen sormenerako grina. Libanon hazi zen, moda eta beste diziplina sortzaile batzuk eskuratzeko aukerak mugatuak ziren ingurune batean. Erreferente falta hori, oztopo bihurtu beharrean, bere irudimena elikatu zuen. Egunerokoari behatzen ikasi zuen, material eta objektu xumeenetan aukerak aurkitzen eta berezko unibertso bat sortzen. Internetik eta modari eskainitako kanalik gabe, bere fantasiazko mundu propioa sortu zuen.
Ikasketak amaitu ondoren, hamar urtez lan egin zuen eta bere publizitate-agentzia sortu zuen. Orduan sortu zitzaion bokazio berri bat: osagarriak eta gehigarriak diseinatzea. Aurkikuntza horrek inflexio-puntua ekarri zuen bere ibilbidean, eta hainbat pertsona, marka eta erakunderekin proiektu eta lankidetzak egiteko bidea ireki zion, besteak beste, Lady Gaga, Madonna, Mugler Paris, Madrilgo Teatro Real, Hermès eta Balenciaga, Museo del Traje-rekin batera.
NAZIOARTEKO DISEINATZAILE GONBIDATUA
ASSAAD AWAD
« Nire pasioa ideia bat errealitate bihurtzea eta pieza bakar batean gauzatzea da. »
Orain, artisau-lana 3D inprimaketaren aukerekin uztartu nahi dudan etapa berri bati ekingo diot. Horretarako, nire bilduma denboragabeetako batzuk berreskuratuko ditut, pieza hibridoen bidez bizitza berri bat emateko.
Iraganaren eta etorkizunaren arteko elkarrizketa da: alde batetik, larruaren lanketa, artisautza-lanbide zaharrenetako bat; bestetik, tresna garaikideak, hala nola 3D inprimaketa eta 3D eskaneatzea. Hori guztia iraunkortasunak funtsezko lekua duen ikuspegitik.
Diseinatzaile gisa egiten dudan lana ez da nire sorkuntza propioetara mugatzen. Beste diseinatzaile eta bezero batzuekin ere lankidetzan aritzen naiz, nire esperientzia, materialen ezagutza eta ikuspegi sortzailea haien eskura jarriz.
Eta pieza ederrak sortzeaz harago, beste konpromiso bat ere badut: ikasitakoa transmititzea. Diseinatzaile eta artisauen belaunaldi berri bat prestatu eta lagundu nahi dut, ezagutza aurrera jarrai dezan, bilaka dadin eta sortzeko modu berriak eman ditzan.
Berritzea ez baita lanbidea atzean uztea, bizirik mantentzeko modu berriak aurkitzea baizik.
BASQUE BIO DESIGN CENTER
Güeñesen kokatuta dagoen Basque BioDesign Center Europako erreferentea da arteari eta kulturari aplikatutako bio-jostungintzan. Laborategiaren, lantegiaren eta sormen-estudioaren arteko espazio hibrido gisa sortu da. Bere eginkizuna etorkizuneko materialen eraldaketa digitala eta jasangarria sustatzea da, esperimentazioaren, berrikuntzaren eta lankidetzaren bidez, teknologian, biologian eta sormenean oinarritutako soluzioak garatuz.
Zentroa diseinuaren, zientziaren, kulturaren eta industriari aplikatutako teknologiaren arteko elkargunea da, eta sormena ekoizpenaren eragile estrategiko gisa sustatzen du. Espainian inspirazio-iturri eta erreferentziazko espazio bakar gisa sendotu nahi du, Euskadiko talentua munduko gainerako lurraldeekin lotzeko eta ikerketa zientifikoaren eta sormen-praktikaren arteko distantzia murrizteko gai izango dena.
BDCk hainbat lan-ildo garatzen ditu. Besteak beste, zinema-, antzerki-, dantza- eta kontzertu-ekoizpenetarako enkargu bereziak egiten ditu, material jasangarriak erabiliz jantzi eta osagarri bakarrak sortuz; hala nola, bioplastikoak, ehun organikoak eta tindagai naturalak. Diseinatzaileekin, arte-zuzendariekin eta eszenografoekin ere lankidetzan aritzen da.
Era berean, kapsula-bildumak eta pieza artistikoak sortzea sustatzen du, Artium, Guggenheim edo Tabakalera bezalako kultur erakundeekin elkarlanean. Horrela, artearen, modaren eta bioteknologiaren arteko elkargunean esperimentazioa bultzatzen du.
Zentroak sormen-egonaldien programa bat ere badu, eta artistekin, diseinatzaileekin eta ehungintzako teknikariekin lankidetzan aritzen da. Horrez gain, urtero arteei aplikatutako bio-jostungintzan oinarritutako deialdiak egiten ditu.
Prestakuntzaren arloan, BDCk biomaterialei, tindagai naturalei eta ehungintzaren jasangarritasunari buruzko tailerrak, hitzaldiak eta masterclassak eskaintzen ditu, birsorkuntzan eta ingurumenarekiko errespetuan oinarritutako kultura material berri bat sustatzeko helburuarekin.
Aldi berean, Basque BioDesign Centerrek Euskadiko jatorri-izendapena duten material berriak garatzen ditu. Lehengaien eta tokiko hondakinen aukera zabal eta anitza baliatuz sortzen ditu material horiek: algak, onddoak, artilea, bakterioak, zelulosa eta elikagaien azpiproduktuak, besteak beste. Material horiek industriaren eta diseinuaren egungo erronkei erantzuteko soluzio berritzaile bihurtzen dira.
Oro har, BDCk berrikuntza jasangarriaren eta diziplinarteko lankidetzaren aldeko apustu estrategikoa egiten du, Euskadi etorkizuneko materialen garapenean eta sormen- zein ekoizpen-prozesuetan jasangarritasuna txertatzen aitzindari den lurralde gisa kokatuz.
Antolatzailea:
Babestu:
Laguntzailea:
